Հայկական Կարմիր խաչի ընկերության ուշադրության կենտրոնում հաշմանդամների խնդիրներն են
Հոկտեմբերի 26-31-ը Հայկական Կարմիր խաչի ընկերությունը, Գերմանական Կարմիր խաչի հետ համատեղ` Գերմանական` Եվրոպական Խաղաղության հիմնադրամի ֆինանսավորմամբ, իրականացրեց «Օգնել. Ես կարող եմ, Դու կարող ես, Մենք կարող ենք…» ծրագրի առաջին փուլը:
Ծրագրի նպատակն էր գերմանացի և հայ 23 երեխաներին (այդ թվում նաև` հաշմանդամ) տեղեկացնել հաշմանդամ մարդկանց առջև ծառացած սոցիալական, հոգեբանական և կենցաղային խնդիրների մասին:
Գերմանական Կարմիր խաչի հետ համագործակցությունը սկսվել է շատ վաղուց` Սպիտակի երկրաշարժից անմիջապես հետո, վերջին տարիներին իրականացվում են մասնավորապես կամավորների փոխանակման ծրագրեր:
Գերմանիայի Բադեն-Վյուրթենբերգի երկրամասից ժամանած 14-17 տարեկան 11 գերմանացի պատանիներ և նրանց 12 հայ հասակակիցները միասին մեկ շաբաթ անցկացրեցին, որի ընթացքում մասնակցեցին առաջին օգնության, առողջ ապրելակերպի և հաշմանդամների խնամքի դասընթացների, եղան Ծիծեռնակաբերդում, Էջմիածնում, Արմավիրի հատուկ դպրոցում:
Երեխաներն այցելեցին նաև Հայկական Կարմիր խաչի ընկերության գրասենյակ, որտեղ նրանց ողջունեց ՀԿԽԸ Գլխավոր քարտուղար Աննա Եղիազարյանը:
Հայ և գերմանացի երեխաները հասցրեցին ընկերանալ: Առաջին օրը մշակութային տարբերությունները դեռ խանգարում էին, բայց կամավորների աջակցությամբ և ուղղորդմամբ նրանց հաջողվեց մեկ թիմ դառնալ ու շփվել նույնիսկ առանց թարգմանչի օգնության:
Գերմանացի խմբին ուղեկցում էր Թամար Բետրոսյանը, որը ծագումով հայ է, բայց ծնվել ու մեծացել է Գերմանիայում:
Թամարը Կարմիր խաչում կամավոր է 2001թ.-ից, առաջին օգնության հրահանգիչ է, նաև ուսուցչուհի է` աշխատում է հատուկ կարիքներ ունեցող երեխաների հետ: Ներառական կրթությունը Գերմանիայում 1987-88թթ.-ից է ներդրված: Աշակերտները առաջին օգնության դասընթացներ են անցնում և սովորում են ամեն պահի օգնել իրար.
- Խնդիրն այն չէ, որ երեխան վիրակապ անել իմանա կամ արհեստական շնչառություն, կարևորն այն է, որ մենք սովորեցնենք կարեկցել դիմացինին, զգալ նրա հոգսն ու ցավը, հոգ տանել նրա մասին: Այս գաղափարն ենք ուզում սերմանել մեր աշակերտների մեջ: Եվ այս ծրագիրն էլ մի հնարավորություն է մեր փորձը փոխանցել մեր հայ գործընկերներին, - ասում է Թամարը:
Ծրագրի մասնակից երեխաները, որոնք Արմավիրի դպրոցներից էին, պատմեցին, որ ծրագրի ընթացքում անցած դասընթացները շատ օգտակար են եղել իրենց համար:
Ջուլիան ու Անին հատկապես տպավորվել էին «Փարոս» հաշմանդամների երգչախմբի ներկայացուցիչների հետ հանդիպումից, որոնք չեն հուսահատվում կամ հանձնվում ու շարունակում են ապրել սովորական կյանքով:
- Ինձ նաև դուր եկավ գերմանացիների այն մոտեցումը, որ այնտեղ հաշմանդամ մարդիկ չեն քաշվում իրենց թերությունից, ու շրջապատն էլ անընդհատ չի ընդգծում հանգիստ է վերաբերվում դրան: Եթե նման ծրագիր էլի լինի, ես մեծ հաճույքով կմասնակցեմ, - պատմեց Ջուլիան:
Ծրագրի ավարտին` հոկտեմբերի 31-ին, Ջոն Կիրակոսյանի անվ. Թիվ 20 դպրոցում կազմակերպվեց գերմանացի և հայ երեխաների համատեղ ուսուցման ու ժամանցի վերաբերյալ լուսանկարների ցուցահանդես, որին հրավիրված էին մասնակցելու նաև դպրոցի աշակերտները, քանի որ դպրոցում նույնպես ներառական կրթություն է իրականացվում և հատուկ կարիքներ ունեցող երեխաներ են սովորում:
«Օգնել. Ես կարող եմ, Դու կարող ես, Մենք կարող ենք…» ծրագրի երկրորդ փուլը կանցկացվի Գերմանիայում:
Ծրագրի իրականացմանն աջակցել են. Երևանի քաղաքպետարանը, «Կոկա-Կոլա բոթլինգ» ՓԲԸ-ն, «Գրանդ Քենդի» ՍՊԸ-ն, Նոյան Տապան» ՍՊԸ-ն, «Մհեր-Արա» ՍՊԸ-ն, ՀՀ-ում Գերմանիայի դաշնային հանրապետության դեսպանությունը, «Աշտարակ-Կաթ» ՓԲԸ-ն:
