Հայկական Կարմիր խաչի ընկերության նախաձեռնությամբ 2024թ․ մարտի 28-ին տեղի է ունեցել «Փախստականների պաշտպանություն և ինտեգրում» ծրագրի շրջանակում իրականացվող՝ տեղահանված երեխաների պաշտպանության դեպքերի վարմանն ուղղված աշխատանքային խմբի հերթական հանդիպումը։
Կյանքի դժվարին իրավիճակում հայտնված երեխաների իրավունքների պաշտպանության աշխատանքային խմբի կազմում են ՄԱԿ ՓԳՀ, Յունիսեֆի, Հայաստանի Հանրապետության աշխատանքի և սոցիալական հարցերի, Կրթության, գիտության, մշակույթի և սպորտի, առողջապահության և արդարադատության նախարարությունների ներկայացուցիչները, ինչպես նաև մասնագետներ՝ Ներքին գործերի նախարարության Միգրացիայի և քաղաքացիության ծառայությունից, Երևանի քաղաքապետարանի աշխատակազմի երեխաների և սոցիալական պաշտպանության ու հանրակրթության վարչություններից։
Հանդիպման նպատակն էր ներկայացնել ԼՂ-ից և այլ երկրներից տեղահանված երեխաների պաշտպանության դեպքերը, քննարկել սոցիալական և կրթական ծառայությունների հասանելիությունն ու մատչելիությունը փախստական երեխաների համար, մասնագիտացված և հատուկ ծառայությունների տրամադրումը։ ՀՀ գերատեսչությունների և հանդիպմանը մասնակից տասից ավելի գործընկերներ հասարակական կազմակերպությունների ներկայացուցիչները, քննարկել են երեխաների պաշտպանության համակարգային խնդիրներ, ինչպես նաև անհատական դեպքեր և առաջարկել լուծման նոր մեխանիզմներ։ Ծրագիրն իրականացվում է ՄԱԿ-ի ՓԳՀ ֆինանսավորմամբ։
